Tuesday, January 30, 2007

أشوف فيك يوم يا أحمد

أنا يتعمل فيا كده؟؟
إذ بي أفوجأ بأحمد باعتلي يقوللي
Dina I tagged you !
فتحت مدونته وأنا بدعي مايكونش الموضوع اللي كنت لسه بقراه حالا في مدونة مبرمج حر وبقول لو اتسألته مش هقدر أجاوب
وطلع هو الحمد لله
!فعلا سبحان الله كل اللي بتمناه بيتحقق
......
استعاننا على الشقا بالله
خمس حاجات ماحدش يعرفهم عني خااالص
هحاول ألاقي إن شاء الله
.....
أولا.. زمان وأنا طفلة -أه والله العظيم زمان كنت طفلة- كان عندي هواية غريبة جدا
كنت كل ما أبأى لوحدي أجيب مسحوق غسيل ومعجون أسنان وألغبطهم على بعض وأحط عليهم شوية مياة وتبأى ريحتهم وحشة جدااااا وأنظف بيهم سيراميك الحمام... قال يعني كده أكثر بياضا
......
ثانيا.. زمان بردو وأنا صغيرة -كنت زمان صغيرة سبحان مغير الأحوال- كنت كل ما أتخانق مع حد في البيت آخد أي حاجة صغيرة من حاجة الشخص ده من وراه وأرميها من الشباك
!أحس إني كده انتصرت
تقريبا والله أعلم معقدة نفسيا
......
ثالثا.. وأنا في ثانوي كنت بكلم صحابي من البيت على الموبايل كتير جداااااا
وفاتورة التليفون جاتلنا 2500 جنيه
وكل الناس حتى الآن مايعرفوش مين اللي كان خلف هذه الجريمة الشنعاء
......
رابعا.. بصراحة وبكل وضوح
أنا جوايا ميول عدوانية فظيعة جدا
كنت لسه والله بفكر امبارح إني كان ينفع أبأى رئيسة عصابة كويسة جدا لكن ربنا رحم الناس
بس مش عارفة ليه الحاجات دي ما بتظهرش
كله لجوا ربنا ما يوريكم
......
خامسا وأخيرا لأني أعتقد إنكم كده كرهتوني وماحدش هيبص في وشي تاني
زمان وأنا في المدرسة -شوفتوا؟ كنت في مدرسة-كنت كتير أوي مابعملش الواجبات
وكنت شاطرة جدا
فلما المدرسة تيجي تفتش على الواجب أوريهولها مرة وعشرة أقول لها معلش نسيت الكشكول بس أنا عاملة الواجب وأنا طبعا ولا عاملاه ولا بتاع
وهم كلهم كانوا بيحبوني أوي ياعيني ومخدوعين فيا
فيقولولي طيب يا حبيبتي ابأي هاتيه المرة اللي جاية بس ماتقوليش لزمايلك علشان مايقولوش اشمعنى دينا
......
كل تاج فظيع زي ده وأنتم طيبين
......
تسنيم ومبرمج حر وأحمد ومصعب راح لهم التاج
نشوف بأه حد تاني

23 comments:

Ahmad said...

LOL !..tab kwayes I chose the right person !!..remind me b3d keda to tag you each time before Anyone else...that was Hilarious !!!!

دينا فهمي said...

فرحان فيا يا احمد؟؟؟
ماااااااااشي
مردودالك باذن الله

تــسنيـم said...

أنا بقى قعدت تلات أيام مش عارفة أكتب إييه وماما قالتلي قوليلهم إنك لوك لوك ومفيش حاجة عندك مستخبية لغاية ما ربنا فتح عليا ولقيت.
محبتي

عبدالله said...

التاج فكرته جميله بس الاجمل ردك تحس ان في روح شقيه بتنط من ورا كلماتك
اول مره ادخل مدونتك و اتمني كل بوستاتك يكون فيها الروح الجميله دي
اجمل ما في كلامك بقي موضوع ميولك العدوانيه شكلك كده اصلا اقصي عدوانيه تعمليها تجري ورا القطه
:)))))
تحياتي

Anonymous said...

كل دة اتعمل وانت صغيرة

امال ايه اللي حصل لما كبرت

ازاي بقيتي متربية زيادة عن

اللزوم..كما أسميك دوما

لما اتصل بيك سيحدث ما يلي

انا:انت ازاي ولا مرة حكيتيلي مصايبك دي

انت:والله بجد لم أذكر مطلقا

أنا:مطلقا مطلقا

دة نص حوار يومي كلما بدأت دينا بحكاية او معلومة عنها

اسمع بعدها التفاصيل

وتتركني متنحة

يارب انا كان ايه اللي رماني الرمية دي

شيمـــــاء said...

كده يا دينا تعمليها فيا
ماشى ماشى


شكلى هتفضح

أحمد said...

هههههههه
أجمل حاجة أنك لسه بتقرى التاج
لقيته مبعوتلك

micheal said...

دينا...معلش أعذري جهلي و فهميني يعهني اية تاج بالضبط علشان أن بلاقي ايميلات كتير فيها كلمة فلان تاجد مي
tagged me
و انا بعم ديليت علي طول لاني بقيت أشك انة فيروس...شفتي الجهل
تحياتي لكي و عمري ماحكرهك لان كلنا لينا حاجات غريبة

maged stephen said...

على الرغم من عدم معرفتى القريبةلشخصيتك
أرجو
أن تقبلى عدم الاتفاق معاكى
فى وصفك ل دينا فى نمرة4

دينا فهمي said...

تسنيم
أحمد بردو قاللي نفس الكلام
قاللي انتي ماعندكيش خصوصيات وكل الناس عارفة عنك كل حاجة (:
بس الحمد لله لقيت أهو


عبد الله
أنا مابحبش القطط على فكرة فعلشان كده طموحاتي العدوانية أعلى من كده بكتير (:
لا والله انا صحيح عدوانية بس طيبة والله (:
نورتني


أندلس (: (: (:
يا بنتي عادي كنتي عايزاني احكيلك ان وانا صغيرة كنت بحط المعجون على المسحوق؟؟ حاجات ما تتقلش أصلها
وبعدين صحيح
هو أنا لم أذكر مطلقا؟؟ (:


شيمااااااء
يللا مستنيين الفضايح


مبرمج حر
أه بجد الموقف شيك
بس الحمد لله عديت من المطب


مايكل
بص يا سيدي أنا والله ما اعرفش موضوع التاج اللي في الميل ده
لكن التاج في المدونة
ان حد يبعتلك أسئلة -حد تاني بعتهاله بردو- تجاوب عليها وتمررها لحد يعني تطلب من الحد ده انه يجاوب هو كمان عليها في مدونته
يا رب أكون قدرت أشرح


ماجد ستيفن المختفي عنا من فترة
لا ماتقلقش دي حقيقة (: بس غير مستغلة

Anonymous said...

ظريفة قوى ثانيا :) فى أطفال كتير كدة لحد الان..هو فعلا تفريغ شحنة غضب :).

تحياتى

هبة الله said...

والله يا دينا الموضوع ده عايز مخمخة...يعني فعلا حلو كتير الواحد يفكر في الاشياء الغريبة اللي كان يتصرفها واللي ماحدش يعرفها...
بس ربنا أمر بالستر...
حشوف لو ينفع تتنشر

******

وعلى فكرة مهما يقولوا وتقولي انا ما بغير فكري فيكي...ولا تسأليني ليه؟؟؟

دينا فهمي said...

ftm
انتي مش عندك مدونة تقريبا بنفس الاسم وللا مش انتي؟؟
نورتيني في الحالتين (:

هبة الله
مستنية كلامك بفارغ الصبر
وربنا يخليكي ليا يا رب

FTM said...

متأسفة ما كنتش داخلة بحساب
blogspot
..نسيت الرابط :(
تحياتى
فاطمة

دينا فهمي said...

أنا مش بلومك طبعا (:
انا بس كنت بسأل
لك كل التحايا

يا قلبي يا غريب said...
This comment has been removed by a blog administrator.
يا قلبي يا غريب said...

كلامك دليل انك طيبه و انتي صغيره و انتي كبيره...و شكرا لزيارنك..تحياني

دينا فهمي said...

ربنا يخليك يا رب بترفعوا من روحي المعنوية (:
نورتني

مُصْعَب إِبْرَاهِيم said...

براءة أطفال غير عادية :)

مصعب -اللي هو أنا- لسة ما جاوبش التاج..

بس هأجاوبه قريبا أوي

^ H@fSS@^ said...

ردودك تحفة و شقاوتك عجباني بجد مسخرة و دمك خفيف و باين انك مكارة اوي
و انا بحب المكاريين

سلام يا عزيزتي

دينا فهمي said...

يللا يا مصعب مستنيين

حفصوتشا بحالها عندنا؟؟ يا مرحبا يا مرحبا
مبسوطة بجد جدا بزيارتك
وأخجلتم تواضعنا يا فندم والله
صحيح أنا مكارة بس مش أوي يعني لاحسن الناس تطفش

Dananeer said...

واضح انك كنت بتكتكى كويس

حلوه يا دينا
خصوصا معجون السنان و اكثر بياضا
:)

دينا فهمي said...

منوراني يا دنانير بجد
كنت بتكتك ومازلت (:
بس في الاخر ما بناخدش الا اللي ربنا كاتبه