Sunday, August 5, 2007

وأنا كل ما أجول التوبة

كنت أغني
.
وأنا كل ما أجول التوبة يا بوي ترميني المجادير يا عين
ترميني المجادير يا عين
واحشاني عيونه السودة يا بوي ومدوبني الحنين يا عين
ومدوبني الحنين يا عين
.
فرددت أختي ذات التسعة أعوام
واحشاني أيامه السودة يا بوي
.
فابتسمت على الرغم مني

21 comments:

اسكندراني اوي said...

هههههههههههههههههههه
طب ذات التسع سنوات شافت ايه من ايامه السوووووووووودده

على قدر ما ابتسمت على قدر ما تسائلت
ليه ؟؟؟
تحياتي

أحمد said...

لأ حلوة
:))

تــسنيـم said...

دينا انتي ليكي اخوات غير أحمد

:)

أندلس said...

ههههههههه بقالي كتييييييييير مدخلتش

ودخلت فطستيني من الضحك

بيبة دي كلها حكم

أنا قلقانة منها

دينا فهمي said...

اسكندراني أوي
هي كانت فاكرة ان دي كلمات الاغنية الصح (: ماكانش قصدها حاجة أكيد
نورتني (:


أحمد
وحشتني تعليقاتك ومتابعتك الجميلة


تسنيم
اه يا بنتي ليا
احنا 4 (:


أندلس
اه يا بنتى دي جامدة جدا ويتخاف منها فعلا ((:

koka said...

الصغيرة جابتلك المفيد يا دينا :))

بس شوفتى بقى .. مش انا لوحدى اللى كنت فاكراه ان ملكيش اخوات غير احمد ;)

دينا فهمي said...

ايوة صح
أكني كنت مخبية عليكم ((:

Reemo said...

إزيك يا قمر
عامله ايه؟؟
ميرسى على سؤالك
انا موجوده وتمام الحمدلله
انا مقدرش أقاطعك طبعا
ده انتى القمر كله
أنا بس كنت مشغوله شويه وأول ما فضيت جيت على طول اهو
متزعليش بقى
قبلاتى

أحمد الدريني said...

"إلا أنها كانت من الذكاء بمكان بحيث لاتطهو نفسها علي مرق الذكري"
ماركيز
الحب في زمن الكوليرا

kafrawy said...

ربنا يخلى ايامكم كلها فرح و سعادة


و يخليلك اختك الصغيرة

دينا فهمي said...

ريمو
حمدا لله على السلامة (:
وانا ما اقدرش ازعل منك يا ستي
المهم انك كويسة (:


أحمد
الجملة دي جامدة جدا
كعادة كل حاجة بتقولهالي بجد
بس قوللي
هو انت بتبأى حافظ كل الكلام ده؟؟ ((:
لو كده يبأى هستعين بيك في المذاكرة على فكرة (:


كفراوي
ربنا يسمع منك يا رب.. ويجعل لك من دعائك نصيبا
نورتني (:

islamventura said...

الله يبارك لك
على الزوق الجميل اللى
ممكن اختك بنت 9 سنبن تحس بيه


انا فى سنها كنت احب الاغنية دى من ماجدة الرومى طبعا

دينا فهمي said...

وانا كمان كنت بحبها وانا صغيرة من ماجدة الرومي
نورتني (:

Islamist Bloke said...

حلوة وملعوبة


انتى متأثرة اوى بالحوار


عارفة

عمرى ما شفت انثى بالوفاء ده الا ام صاحبي...........لابسة اسود وجوزها مات من عشرين سنة


غير كدة يا بنتي...........مشفتش ولا هشوف


ربنا يهدينا ويهديكي ويبارك فيكي

والسلام

دينا فهمي said...

الفكرة مش فكرة وفاء
أنا لو عليا وبقولها وعارفة انه ممكن يشوفها.. عايزة أنسى وأعيش حياة طبيعية زي ما هو عايش حياة طبيعية
وبإذن الله هعمل كده.. ووفائي اللي انت بتقول عليه الاحسن انه يكون لحد اختارني.. وساعتها هيبأى يستحقه

Eric Matt said...


أول مرة ليا هنا ومش الأخيرة ان شاء الله

أنا بس داخل أسجل اعجابي بالكلمات أولا

وثانيا لفت نظري في البروفايل بتاعك ان من هواياتاك واهتماماتك الاستماع ودي أول مرة في حياتي أشوفها

عجبتني الفكرة قوي

تحياتي لك من ماناساس البلد

دينا فهمي said...

سعيدة جدا بزيارتك وأتمنى انها فعلا تتكرر
أما عن موضوع الاستماع فدي حقيقة فعلا (:

كل التحايا

علوة said...

أنحني احتراما لهذه المدونة التي جمعت بين رقة المرأة في ألوانها الطفولية وقوة المرأة في أن تقول الذي لا يقال

وهناك جملة لم ار أحدا قد لاحظها
" فابتسمت على الرغم مني "

وفي رأيي بسيط الأهمية، هذه هي نقطة القوة بالموضوع ، وليس الإفيه الرائع من أختك ذات التسع سنوات مع احترامي لها وقبلتي على جبينها ولو ينفع كنت جبت شيكولاتة لها !!!

محمد العدوي said...

هههههههههههههه

دا عملا بمبدأ القط يشتاق لخناقه ..



كل الود

كريم بهي said...

ممكن تخفى السواد بماك أب

كريم بهى
شاعر

ومدون جديد
وتابعك من زماااااااااااان
تحياتى لاختك العسولة دى

دينا فهمي said...

علوة
أولا.. متشكرة جدا على كلامك وشرفتني بزيارتك
ثانيا
صح فعلا الجملة دي أهم من تعليقها بس هم الناس بيعلقوا عليها لطرافتها بس (:


محمد العدوي
هي تمشي على كل المحامل (:
نورتني


كريم بهي
الماك أب للأسف بيداري بس.. لكن بيفضل السواد تحته
واحنا مش عايزين كده (:
وأهلا بيك يا كريم في عالم التدوين
ومتشكرة فعلا على المتابعة (: