Thursday, July 5, 2007

من شعر علي سلامة

معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا ولا في الكلام ولا عارف أنام
ولا حتى بسأل إيه ده إيه و أخرتها إيه و إيه العمل
.
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني الألم
أو يستلفلي من لئيم حبّة أمل
حالة كده .. معرفش إيه
.
حالة كده ملهاش معالم
ساعات تزورني في الربيع .. في الحر .. و في عز الشتا
و تجيب حاجات لا فيها روح ولا ميتة
لكني برجع منّها بعد السكات .. فاهم شوية في اللي فات
حاسس أوي بحزن الصحاب .. محظوظ أنا
ساعات أشاور ينفتحلي ألف باب
لكنّي بغلط في الحساب
معرفش ليه

8 comments:

shreef said...

يا سلام عليك يا علي يا سلامة اللي بحبه في الراجل ده انه تلقائي في كلامه..تحياتي ليكي..سلام

هيثم ابوعقرب said...

تفتكري
ان دي حاله عندك لوحدك
.
.
.
.
مفتكرش
بس احلي حاجه ف البوست ان الباك جوند بتاعته مزيكا فيروز

امرأة تقول الذي لا يقال said...

معاك حق يا شريف
كلامه طبيعي وتلقائي
نورتني (:


هيثم
لا أنا متأكدة انها عند ناس كتير (:

الابن الضال said...

الراجل ده جامد موت
وعلى فكرة الأحلى إنك تسمعيه وهو بيلقي قصايده
تحححححححفة
http://www.youtube.com/watch?v=ZkYLrSpM74E&mode=related&search=

ملحوظة لا تهم أحد:
أنا حاليا بمر بالحالة دي

shaimaa said...

آآآآآآآه بجد

امرأة تقول الذي لا يقال said...

الابن الضال اللي واجع لنا دماغنا
صح انت قبل كده ادتلي لينكات عشان اشوفه وفعلا كان جامد جدا
وبعدين واضح ان كلنا بنمر بالحالة دي (:
رد شيماء كمان بيقول كده s:

اسكندراني اوي said...

مش لوحدك الحالات دي منتشره اويييييييييييييييييييييييي

ربنا بس يعديها على خير
انا اول مره اجيلك بس حقيقي البلوج جمييييييييييييييييل

امرأة تقول الذي لا يقال said...

نورتني بجد بزيارتك (:
وربنا يبعد عننا كلنا شر الحالات دي