Friday, June 29, 2007

العربية اتغيرت
العربية اللي اتعلمت عليها السواقة ومن يومها ماركبتش غيرها
بجد متأزمة نفسيا جدا
ليه تتغير وهي كويسة وبنت حلال عشان نجيب واحدة اوتوماتيك ماشية بيها أكني أول مرة أسوق
مش متحكمة فيها وحسة بالإحساس اللي كنت بحسه أيام ما كنت لسه بتعلم السواقة
حسة إني كارهة السواقة وكارهة أنزل بالعربية تاني وهاين عليا أعيط بجد
بجد كنت بحبها.. وزعلانة فعلا إنها مش هتبأى معايا تاني
لك مني كل تحية يا سيارتي العزيزة
......
على الهامش
كنت أبحث عنه داخل كل سيارة لانوس سوداء
وكان يبحث عني داخل كل سيارة لانوس نبيتية اللون
أصبح هو بلا سيارة بعد زواجه
وصارت سيارتي أخرى جديدة.. بيضاء

26 comments:

احمد رفعت said...

بسم الله أول نعليق

أولا انا أول مرة ازور لبلوج بتاعك بس فعلا الاسم استفزني اني أدخل أشوف مين المرأة ديه :)

ثانياً مجرب احساسك يوم ما اتباعت العربية اللي اولدت لاقتها واتعلمت عليها واصبحت بعد ذلك سيارتي بس فعلا اصبحت فزدقة (سيارتي الجديدة) أحب الى من حموري (سيارتي السابقة )

بوست لذيذ :)

امرأة تقول الذي لا يقال said...

نورت المدونة بزيارتك.. ويا رب تكون ما اتصدمتش بعد ما شوفت المدونة صاحبة الاسم اللي استفزك (:

أنا كمان بمني نفسي بجد اني اتعود
ساعة لما غيرت موبايلي القديم بردو كنت متأزمة جدا في الاول وبعد كده مابأتش أحس بيني وبينه بألفة خالص
بس إلى ذلك الحين الموقف هيفضل صعب

يا مراكبي said...

ده في الأول بس يا دينا .. وده طبيعي على فكرة .. الحنين للأشياء والأماكن ده شعور طبيعي

لكن تأثير الشعور ده عليكي هيقل بعد ده شوية شوية كل ما تكتر التغييرات .. إبقى إفتكري كلامي ده لما تغيري العربية العاشرة والشقة الخامسة والموبايل العشرين و و و

أنا سكنت في أماكن عديدة في عشر دول مختلفه .. الأولى زعلت عليها كتير لما سيبتها .. لكن بعد كده خلاص

على فكرة .. أنا مسجل بيانات كا اللي بأتابعهم عندي ومتأكد من موضوع ال 18 سنة اللي إتغير ل 22 سنة ده .. يمكن أنا اللي كنت مسجل غلط

يا مراكبي said...

ملحوظة: شكلنا مش هنخلص من موضوع الهامش ده وألا إيه؟

الابن الضال said...

محدثة نعمة
:P
مبروك يا دينا...تدوب في عرق العافية
:D

مبرمج حر said...

بوست جميل يا دينا

أجمل كلمة عجبتنى فيه على الأطلاق هى أخر كلمة
"
بيضاء
"

:)

e7na said...

انا برضه لما بأغير العربيه الميكروباص باحس بنفس الاحساس

امرأة تقول الذي لا يقال said...

يا مراكبي
كل الناس بتقوللي فعلا إني هتعود بعد كده.. بس دي مش حاجة حلوة على فكرة
اني أتعود على فقد الأشياء..
أما موضوع الهامش فبإذن الله هنخلص منه قريب (:
وسني والله 22 من ساعة ما فتحت البلوج
العتب على التسجيل بتاعك (:


الابن الضال
مين دي يا بابا اللي محدثة نعمة؟؟
روح العب بعيد يا شاطر
وعايز تقابلني كمان؟؟ مش هقابلك عشان خايفة عليك عشان ما ادكش بحاجة في وشك


أحمد اللي مقاطعني تقريبا مش عارفة ليه
الكلمة دي سبحان الله يا أحمد جت مظبوطة جدا مع إنها حقيقية ومش قصداها
ربنا يجعل حياتنا كلها أيام بيضاء (:


إحنا
أنا مش فاهمة حضرتك تقصد ايه بالعربية الميكروباص
هل تقصد بيها الvan وللا تقصد بيها تريأة الله أعلم
بس عموما شرفت بزيارتك

أندلس said...

راح فين تعليقي يا هانم
حذفته الرقابة؟؟

امرأة تقول الذي لا يقال said...

لا والله ماوصلش

حزيــــــــــــــــــن said...

انا اول مره ادخل عندك
كنت عايز اعرف هتقولى ايه يعنى
عموما مبروك العربيه الجديده
واضح انك مخلصه حتى للاشياء
ابقى زورينى

shaimaa said...

ياريت الهامش يتبدل بهامش اجمل واجدد و اقوى

اجترار الذكريات صعب اوى

امرأة تقول الذي لا يقال said...

حزين
شرفت بزيارتك الأولى
ولبيت دعوتك
والله يبارك فيك (:


بإذن الله هيتبدل يا شيماء (:

Anonymous said...

مبروك عربيتك الجديدة يا دينا وربنا يبارك لك فيها ان شاء الله
ومعلش كلها شوية وتتعودى عليها
عاشقة ضوء القمر

أحمد عيسي said...

نهايتها حلوة قوي علي فكرة
حتي لو مش مقصودة

البلوج بتاعك جميل علي فكرة

امرأة تقول الذي لا يقال said...

عاشقة ضوء القمر
الله يبارك فيكي يا رب (:

أحمد عيسى
متشكرة جدا بجد (:

mariam said...

انا عارفه الشعور ده
لأنى انا كمان عندى ارتباط غريب بأى حاجه عندى
و بخاف جدا انى اغير حاجتى
تحياتى ليكى

امرأة تقول الذي لا يقال said...

مش خوف والله يا مريم
بس العشرة بجد مابتهونش

3abdo me7tas said...

مبروك
وتحمدى ربنا انك اتعلمتى السواقة غيرك مش بيعرف يسوق اصلا
انا عن نفسي اول مرة اتعلم فيها السواقة كانت على جرار زراعى وبعدين عربية نص نقل
عشان شغلى يعنى فى المزرعة

امرأة تقول الذي لا يقال said...

ما أنا عارفة طبعا الحمد لله (:

حقى اهرتل said...

انتى بتعرفى تسوقى يا بختك
على فكره ده حسد بس والله

امرأة تقول الذي لا يقال said...

(:
الله أكبر في عينك (:

اسكندراني اوي said...

الحنين الى القديم
انا لما بعت الريجاتا مراتي عيطت
ولما جبت الهيونداي انا اللي عيطت
ههههههههههههههههه

الذكريااااااااااات يا عزيزتي

بس حتتعودي

امرأة تقول الذي لا يقال said...

اتعودت فعلا (:

باسم said...

كلما قرأت هذا النص وجدته يستفزني للكتابة عنه، والاستفزاز في هذا النص المبدع هو ذلك القناع من بساطة مخادعة تخفي تحتها ركام من التعقيد. نبتدي من أول التكنيك اللي هو أول شيء بيلفت نظري. التكنيك ده بسميه (الموت المفاجيء) زي طريقة لعب المنتخب الإيطالي. الدنيا ماشية بيس وبعد النص ما تفتكر انه خلص يسيب لك ملحوظة صغننة أو معلومة صغيورة تعيد ترتيب الدنيا من تاني. هنا التكنيك مستغل بأفضل صوره، لأنها عملت تغيير بسيط في الملحوظة وهو النقلة من العامية للفصحى وده بيعمل حالة انتباه للقاريء(خلي بالك هنا في نقلة) مع الحفاظ على بساطة الجمل، اللي من غيرها ما ينفعش تعمل قفلة قوية.
تاني حاجة النص نفسه.. وده مشكلة كبيرة
الكاتبة هنا بتجرك معاها واحدة واحدة
العربية اتغيرت.. وأنا مالي- ده أول انطباع. بس هي ضحكت عليك من أولها وبعتتك في سكة تانية.
العربية اللي.. هنا بداية السحب العاطفي بربطك بحاجة مادية، عشان لما تتكلم عن موضوع المانول والأتوماتيك تكون وصلت لقمة التعاطف معها.
الموضوع عامل زي كل حاجة بتتعامل معاها بتلقائية في حياتك.. ساعة لما قريت النص لأول مرة فكرت إني ممكن ادخل المطبخ بالليل وأعمل لنفسي كوباية شاي بدون ما أولع النور.. ببساطة إيديا عارفة مكان كل حاجة.. موضوع السواقة عامل زي كده.. بالذات الفتيس محدش بيبص عليه وهو بيحركه.
لو مريت بتجربة انك تعيش في مكان تاني هتفهم الكلام اللي بعد كده.. حالة الضيق وكراهية الدنيا لافتقاد شيء مكنتش بتفكر فيه لما كان معاك، بس لما تفقده بتحس اد إيه كان عزيز عليك وكنت بتحبه من غير ماتاخد بالك.
قيمة كل اللي فات ده هو نقلك في مستواها الشعوري.. بمعنى آخر توحدك مع حالة الكاتب بأبسط وأقل كلمات.
التقيل ورا..
تقل الأربع جمل مش في النقلة من العامية للفصحى مع الحفاظ على حالة البساطة.
ولا في طعنة المعلومة إنه فيه واحد اتجوز وسابها
ولكن في يقينها من إنه لسه بيدور عليها
والأدهى إنها لسه بتدور عليه في عربيته السودة اللي باعها.
والطعنة الكبيرة في الجملة الأخيرة.. لما بفكر إنه بيبص على كل لانوس نبيتي بشكل تلقائي، دون قصد منه، بس عمره ما هيلاقيها تاني عشان هي غيرت العربية غصبن عنها.

الحاجة اللي ناقص أقولها إن عنوان البلوج مش عاجبني "امرأة تقول الذي لا يقال"
بنيتي كل حاجة بتتقال دلوقت. المشكلة هي بتتقال إزاي.
شعر علي سلامة اللي ملية بيه البلوج رائع. الراجل ده مشكلة. مش عايز اشبه بصلاح جاهين لأن ليه صوت متميز خاص بيه.

امرأة تقول الذي لا يقال said...

باسم
تعليقك على الموضوع أنا مش هرد عليه هنا لإن ده عايز له موضوع لوحده
لكن أنا هعلق على الحاجتين التانيين
اسم المدونة
أنا عارفة ان كل حاجة بأت بتتقال دلوقتى
وعارفة كمان ان الكلام اللي أنا بقوله مش سر ومش حكر عليا (:
بس اللي قصدته بيه هو نفسه اللي انت قلته
ان مش كل اللي بيتقال زي بعضه
لا في حد بيقول.. وفي حد بيقول بتميز
أيا كان سبب التميز
الإحساس اللغة البساطة أي حاجة
المهم إنه يكون مميز

أما ششعر علي سلامة
فأنا مش مالية بيه المدونة ولا حاجة (: ده هم كام بيت بس

بجد أسعدتني