Saturday, April 14, 2007

حبة أوكسجين بأه

يللا نخرج بأه شوية من جو الخنقة اللي كنت معيشاكم فيه وهعمل في أحمد معروف وأجاوب له على تاج من التلاتة اللي بلاني بيهم قصدي اللي بعتهملي
وهبتدي بآخر تاج بعته
اللي كان بيقول
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها
مش عارفة ليه سؤال أحمد فكرني بامتحانات الثانوية العامة.. بس مش مشكلة هعمل نفسي ماخدتش بالي
بصو أنا هقوللكم الصراحة عشان مانحورش على بعض
أنا أكتر حاجة بحبها وبعتبرها هوايتي هي القراءة
بس الحقيقة إني لما بقرأ حاجة مابندمجش أوي للدرجة اللي أحمد بيقول عليها دي
لكن في حاجة لما بعملها بندمج فيها جدا مع إنها مش هواية
هقوللها وماحدش يضحك عليا
الكلام في التليفون
أه والله بجد
أنا بحب اتكلم في التليفون أوي على فكرة
ولما بتكلم في التليفون فعلا بحس إني عايشة مع الشخصية اللي بكلمها ومش عايشة في بيتنا
(: أعتقد إن دي أكتر حاجة أنا ببأى مندمجة فيها
في حد عنده اعتراض؟؟
يللا نمرر السؤال لحد
مصعب اللي مش فاهمة مختفي فين

16 comments:

تسـنيم said...

حلوة أوووووووووي.. بس يا ترى كلامك مع كل الناس والا مع شخصيات معينة يا دندن ;)) محبتي

أحمد عيسي said...

علي فكرة مش بتحصل كتير اني ابقي صاحب اول تعليق يعني دي مناسبة يشرفني اني احتفل بيها خصوصا انها اول مرة عندك ويارب مكونش ضيف تقيل
علي فكرة انا قلبت في المدونة بتاعتك ..جميلة قوي ماشاء الله..بس مش حتخلص من اول مرة اديني كدة ييجي 3 سنين تكون خلصن!!
هوايتك الكلام في التليفون؟..يافرحة المصرية للاتصالات بقي..ومن غير حوارات
يلا سلام..وحاجي تاني ان شاء الله

حسام مراد said...

هيييييييييييييه انا اول واحد اعلق
مدونتك حلوه اوى ودى اول زياره ليا واول تعليق كمان
ثانيوه عامه مين الواحد ماشدق نسى الهم ده
بس مش داخله دماغى الكلام فى التليفون

حسام مراد
شغال
اتمنى الزياره
http://7ossampts.blogspot.com
سلام

Mohamed A. Ghaffar said...

يا سلام ، اخيراً جالك تاج ومدبستنيش فيه

بس انا ادبست من حته تانيه واللى كان كان

دينا فهمي said...

ما هو بالظبط يا محمد انا مادبستكش عشان شوفت احمد بعتهولك فقلت يللا نعفيه
انا نازلة دلوقتي ولما أرجع هرد عليكم تانى باذن الله

smraa alnil said...

ههههههههههه

اهم حاجة فاتورة التلفون عندكو ايه نظامها
تروحي وترجعي بالسلامة

مبرمج حر said...

ايوه يا دينا , مالك بقى زعلانة من التاج ليه , وبتقولى اللى بلانى بيهم احمد , يا جدعان انا مش عارف أنتوا بتكرهوا التيجان ليه , التاج علامة للشخص , بتعلم الشخص , التاج بيعبر بايجاز شديد عن شخص ما , فى اللذيذ يعنى , ثم انا ببعت التاج للناس اللى بعزهم جدا , تقومى فى الأخر تقوليلى "اللى بلانى بيهم احمد" , وبعدين انا سؤالى زى اسئلة امتحانات الثانوية الحامية , ههههههههههههه , ده لذيذ ودمه خفيف

دينا فهمي said...

لا يا تسنيم أكيد مش كل الناس
الناس اللي بحبهم بس
زيك كده (:


أحمد عيسى
نورتني وشرفتني بجد
وياريت فعلا زيارتك تتكرر تانى
ومتشكرة على رأيك

دينا فهمي said...

حسام
شرفتني بزيارتك الأولى
بس ليه بس مش داخل دماغك موضوع التليفون؟؟

سمراء النيل
والله يا بنتى بيشدوا في شعرهم (:
الله يكون في عونهم


مش زعلانة والله يا احمد
بس انت عارف
التاج ده بيحسسنى انى ورايا واجب
وانا بكره الواااااااجبات (:

مبرمج حر said...

خلاص يا ستى ولا يهمك

المهم

أنا حولت الاغنية , دلوقتى تقدرى تنزليها وتسمعيها , يالا تعالى اسمعيها وقوليلى رأيك

دينا فهمي said...

بأه كده يا احمد؟؟؟
ماتوقعتهاش منك خاااالص وكنت بكدب نفسي
ده انا قطعت الخلف يا ابني

مبرمج حر said...

هههههههههههههههه

أنا نفس الكلام برضوه , كنت نعسان جداا وقرفان على الاخر , وكمان الاغنية بتهدى الواحد خالص ومرة واحدة الصدمة , والله يا دينا الكيبورد وقعت من ايدى ههههههههههههه , بس ضحكت من قلبى بعدها , يالا بقى اعمليها فى اصحابك اللى بتحبيهم

shaimaa said...

لما شفت اسم شيماء
قلت هو انا كل لما اجى ادبسها فى حاجة تدبسنى قبلها
بس الحمد لله مطلعتش انا

انا بقى بعتلى
3 تيجان
نياهاهاها
:)

دينا فهمي said...

انا اعمل في حد كده؟؟ يا ابني حرام عليك
وللا عايزني أعمل كده عشان تحديد النسل وللا ايه؟؟ (:



شيمااااااء
فينك يا بنتي؟؟
أنا قلت قررتي تقاطعيني فعشان كده مابعتلكيش التاج
نورتيني يا فندم
ماتقطعيش الجوابات

shaimaa said...

اخص عليكى
انا اقاطع الرقة دى
مش انت اللى هربتى وقفلتى البلوء
ما علينا

بس منورة و الله يا دودو

اصل انا عقبال املتك فى شغل جديد
فيعنى متظبطة
:)

كفاية كده مصر كلها عرفت اخبارى عندك
:D

دينا فهمي said...

يا ستى الف الف مبروك
ربنا يجعله وش خير وسعد وهنا وكل اجة حلوة عليكي (:
خلاص يا شيماء التاج ده مني ليكي
انطلقي