Sunday, March 18, 2007

إن شاالله ما حد حوش

أحمد ومحمد عبد الغفار ليهم في ذمتي تاج
يللا عشان لو جرالي حاجة ماتقولوش إني كنت مانعة عنكم التاجات
.....
الأولة بسم الله
اسم مدونتك؟
بالعربي الفصيح

لماذا اخترته.. ماذا تقصد به؟
السؤالين بيتهيألي إجابتهم واحدة
أنا كنت عايزة أثبت لكل اللي هيقرأ كلامي في يوم إن اللغة الفصحى قادرة على التعبير عن كل المشاعر الإنسانية ببساطة وسلاسة ممكن كل الناس تفهمها
وإن الفصحى مش لغة قاصرة على الكلام المكلكع اللي مش مفهوم.. وخدت عهد على نفسي إني مش هكتب في المدونة إلا بالفصحى.. وماخرجتش عن القاعدة دي إلا مرة واحدة كتبت فيها زي حكمة بالإنجليزي لإني كنت شايفة إن معناها أحلى وهي مش مترجمة
والحالة التانية اللي مش بكتب فيها بالفصحى إني أكون بجاوب على تاج لأن مش معنى إني عايزة أوضح إن الفصحى لغة مناسبة لكل وقت إني ضد العامية.. بالعكس أنا مؤمنة إن العامية هي لغتي الأصلية مش الفصحى
هل فكرت في إغلاق المدونة.. والسبب؟
طبعا فكرت ونفذت كمان وبعد كده رجعت في كلامي
أما عن السبب فلأني حسيت إن عالم المدونات والمنتديات والنت بصورة عامة عالم افتراضي بحت ومابيستمرش في الارتباط بيه -مع الاعتذار للكل- إلا شخصيات غير متأقلمة اجتماعيا مع من حولها
يعني في اعتقادي إن معظم -إن لم يكن كل- اللي مرتبطين بالعوالم الافتراضية دي عندهم مشكلة في التواصل مع الآخر على أرض الواقع مع اختلاف المشاكل المسببة لعدم القدرة على التواصل
ولما اتأكدت من النقطة دي حزّ في نفسي أوي إن أنا أبأى قدام نفسي عندي مشكلة في التواصل مع الناس وقلت لا لازم أعمل شجيعة السيما وأبعد عن العالم ده خالص عشان أبأى صحيحة نفسيا واجتماعيا وفنتظيا وكل حاجة
وفي الآخر لقيت نفسي مرتبطة فعلا بالمدونة وبالناس.. فرجعت
اوعوا تفتكروا إني رجعت عشان عندي مشكلة في التواصل
لااااااا
لا يمكن أبدا

صورتك ف المدونة، رمزيتها؟
ماعنديش صورة رمزية

طبيعة كتابتك في المدونة بشكل عام.. سياسة.. قصة.. عبث.. كلام فاضي؟
كتاباتي في المدونة هي أنا
وأنا ماليش في السياسة ولا الرياضة ولا أي حاجة من شأنها رفع الضغط
متذوقة لبعض الشعروالباقي عبث وكلام فاضي
ولكنه عبث وكلام فاضي بيشاركني فيه كل الناس ولو بجزء بسيط

لماذا تدون أصلاً؟
من 10 سنين تقريبا ابتديت أعبر عن اللي جوايا بالكتابة
في البداية كنت مابحبش إن حد يقرا اللي بكتبه
وبعد فترة اكتشفت إني ممكن أكتب وأنشر كلامي لناس مايعرفوش عني أي حاجة
وراقت لي الفكرة جدا.. فابتديت أنشر اللي بكتبه على منتديات كنت مشتركة فيها
وكان في منتدى بحبه جدا فتحت لنفسي فيه موضوع مخصوص عشان أكتب فيه حاجات بنفس الأسلوب اللي بكتب بيه في المدونة حاليا..اللي هو جمل بسيطة وقصيرة بتعبر عن اللي جوايا سواء كانت من تأليفي أو مقتبسة
وبعدين لقيت إن الأحلى إني أعمل مدونة لنفسي من بابها بدل الموضوع اللي في المنتدى.. وفعلا لقيت هنا بغيتي

أحلى جملة قيلت لك في وصف مدونتك؟
أجمل حاجة حد قالهالي هي جملة أحمد اللي قالهالي لما قفلت مدونتي فترة
قال بالنص: مدونتك كانت محطة مهمة جدااااا.. هاقولك أزاى
تخيلى معايا فضاء كبيـــــــــــــــــــــــــــــر أسمه فضاء الحرية .. والفضاء مليان احياء و شوراع و فيه وسط البلد.. فى تخيلى أنا , ان وسط البلد فيه المدونات المتميزةمدونتك أنتى فى وسط البلد , فى وسط فضاء الحرية مع مدونات تانية متميزة برضوهأنا بقى أنزل وسط البلد.. أروح المدونة دى شوية و أعدى على المدونة شوية وأروح المدونة بتاعتك أشرب شاى بالنعناع

التعليقات بالنسبة لك.. أهميتها؟
بحس إن في ناس حسة بيا ومشاركاني كل حالاتي

أحلى بوست كتبته.. ضع اللينك.. ثم اذكر لماذا؟
كلمة أحلى دي أنا مش مستريحة لها الحقيقة
لإن أحلى معناها بيتهيألي إن الموضوع معايير الحكم عليه المفروض تكون معايير فنية بحتة
فأنا هختار موضوعين بمعيارين مختلفين
معيار فني ومعيار شخصي
الموضوع ذو المعيار الفني هو موضوع آخر كلماتي
والموضوع ذو المعيار الشخصي هو موضوع حدد طريقك لأنه كان إيذانا بنقطة تحول في حياتي

أفضل مدونة قرأتها.. يمكن اختيار عدة مدونات؟
كل مدونة أنا بتابعها هي في نظري من أفضل المدونات
ومعياري في الاختيار مش معيار فني ولا حاجة.. معيار روحي لو جاز التعبير
حاجة كده زي ما ممكن تدخل قصور كلها فخامة و أبهة وماترتحش وساعات تدخل بيوت بسيطة لكن تحس إن كل حاجة فيها حقيقية
البسمة حقيقية الحزن حقيقي المشاعر حقيقية كل حاجة حقيقية
بالظبط ده حال المدونات
ساعات بدخل مدونات المستوى الثقافي والفكري واللغوي بتاع أصحابها هايل لكن مش ببأى مبسوطة
يمكن العتب على الفهم.. الله أعلم بس دي الحقيقة

أفضل بوست قرأته.. يمكن اختيار أكثر من بوست.. ومتنساش اللينك؟
كل بوست انفعلت بيه ورديت عليه عند حد يبأى عجبني
وصعب أوي موضوع أفضل بوست ده بجد مفيش حاجة معينة في بالي

هل خسرت صديق بسبب كتابة هنا؟
لا الحمد لله

حد قل أدبه فى التعليق.. إيه رد فعلك؟
أيوة في
دخل مجهول وفاكرني مش عارفاه وأكيد اتصدم ياعيني لما لقاني مفعلة خاصية إن الردود تعدي عليا قبل ماتتنشروكل اللي عملته إني رفضت نشر التعليق

أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟
مدونات المثليين والمثليات
الحمد لله الذي عافانا

أسوأ بوست.. لازم تجاوب.. ويسمح بتعدد الاختيارات؟
أي بوست بيتكلم عن موضوع غير لائق سواء دينيا أو اجتماعيا

أسوأ مدون.. ما هو حاتجاوب حاتجاوب؟
مفيش حد في بالي والله
اللي مابيعجبنيش مابدخلوش تاني وانسى الفكرة وخلاص

11 comments:

david santos said...
This comment has been removed by a blog administrator.
Anonymous said...

بعد التحيه
اظاهر انى وقعت فى مدونه المنفلوطى او كاتب كبير مثلو اجاباتك وردودك حلو وفيها دبلوماسيه عاليه يعنى فى سياسه فى كلامك بجانب ان شكلك كاتبه قويه اما با النسبه للمنفلوطى حبيبى هو وكتاباتو
بس نسيت مين احمد الى بتكلمى عليه
احب اتعرف على اصحاب الفكر المنير

دينا فهمي said...

المنفلوطي مرة واحدة؟؟؟؟؟
لو في حد من أنصار المنفلوطي عدا من هنا إبأى حاول تستخبى لأني ما أقدرش ءأمن لك العواقب
بجد مجاملة أشكرك عليها
ومتشكرة كمان إنك لفتت نظري إني ماكررتش وضع لينك مدونة أحمد تاني لما اتكلمت عنه لتاني مرة بس أنا اعتمدت إني حطيتها في أول سطر ليا في كلامي عن اللي مررولي التاج
وأحمد هو صاحب مدونة مبرمج حر
شرفت بزيارتك فعلا

أحمد said...


أنا كنت عايزة أثبت لكل اللي هيقرأ كلامي في يوم إن اللغة الفصحى قادرة على التعبير عن كل المشاعر الإنسانية ببساطة وسلاسة ممكن كل الناس تفهمها
وإن الفصحى مش لغة قاصرة على الكلام المكلكع اللي مش مفهوم

لما سميت اللينك بتاعك عندى فى اللينكات المفضلة بأسم دينا فهمى و لُغتُنا الجميلة
كان ده أحساسى فعلا من أول بوست قرأته عندك

كل ما باجى عندك المدونة كأنى بشرب شاى بالنعناع , أنا مش هاقولك الشاى بالنعناع بيثمل ليا أيه .. أبسط حاجة هى الإنتعاش اللامحدود

أما عن البوست الحصرى اللى تحت
فهو بوست روعة بجد يا دينا

دينا فهمي said...

بجد يا أحمد انت من أكتر الناس اللي أنا بعتز بمعرفتهم من خلال مدونتي
ومعتزة جدا بكلماتك
وإعجابك بجملتي الأخيرة بشكرك عليه فعلا

محمد عبد الغفار said...

متشكر على الإستجابة

إجابات لا ينقصها الصراحه والوضوح ابدأ ، تمسكك بالفصح رائع ويستحق ان يكون سبب لأسم مدونة فعلاً ، الغريب انى لم الحظ ذلك مطلقاً

ولن أسأل من هو عمرو

دينا فهمي said...

العفو أي خدمة (:
ومعنى إنك مالاحظتش ده على فكرة إن أنا نجحت في اللي كنت عايزاه
لأن معنى كده إن الفصحى ماحسستكش بغربة في المكان لفتت نظرك
وأحسن حاجة إنك ماتسألش مين عمرو (:

كلبوزة لكن سمباتيك said...

التاج علينا حق


منجلكش في تاج وحش


تحياتي

دينا فهمي said...

مبسوطة بجد بزيارتك يا سمباتيك
شرفتيني (:

Anonymous said...

حقيقى فخور بوجود ناس زيك كده

دمتى بكل خير وحب وتقدير

وان شاء الله هابقى اتابعك باستمرار

سلام

دينا فهمي said...

متشكرة جدا