بآلي كتير ماكانش عدت عليا سنة زي 2007
أو يمكن هي السنة الوحيدة اللي كانت بالشكل ده طول حياتي
ومش عارفة هل لأن 2007 فعلا كانت أرحم بيا من السنين اللي فاتت؟
وللا عشان أنا اللي ابتديت أتّبع طريقة جديدة في حياتي؟
أعتقد إنه هو السبب التاني
ماما كانت دايما بتقوللي من زمان مثل عجيب
صباعك اللي يوجعك اقطعيه
وتقريبا هو ده اللي أنا بأيت اعمله من غير ما أحس
(: ومش عارفة هل ده كانت نتيجة لكتر الوجع؟ وللا لكتر الصوابع؟
.
والحق يقال
السنة دي فعلا اتحقق لي جزء كبير جدا من أحلامي
أو ممكن أقول إن كل الأحلام اللي كنت بتمناها للفترة دي في حياتي اتحققت الحمد لله
وحياتي بأت أوسع وأحلى
.
والأهم من ده كله
إني بأه عندي أمل في بكرة
فله كل الامتنان.. والحب
(: ومادام التمني عمل شغل السنة اللي فاتت
يبأى أنا ما أملكش للسنة الجديدة غير إني أتمنى منها إنها ترسم على شفاهي بسمة أعرض من اللي رسمتها2007
.
(: بجد الطمع وحش
.
اللهم لك الحمد كما ينبغي لجلال وجهك وعظيم سلطانك
